SERMON - HMUN NGHET

HMUN NGHET

Kan awmna leia in hi thiat mah sela, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a 2 Korinth 5:1.

I.        Awmna hmun nghet nei lova pem kual reng mai, insawn sek mai an awm ṭhin; a hrehawm ngawt ang. A neituten, "Chhuak rawh u," an tih theih reng dinhmuna ding, mi in luahtute hi an khawngaihthlak ngawt nia!

II.     Khawvela Isua ringtute dinhmun pawh hetiang deuh hi a ni.

-          Kan thla a ngam tak thei lova, ṭahna tur a tam a.

-          Min hmangaihtu tam tak karah min hmangaih reng reng lo, a hriat pawh min hre lo, kan tel lova tlei zo hi an va tam êm!

-          Kan dam leh kan thih hunah leh ka thih danah pawh thu kan nei lova, Lalin a hun a tihah chuan kan duh emaw duh lo emaw kan kal mai a ngai a.

-          Natna thuah ni se dam viah duh vek hi kan na reng mai a. KA NUN kan tih ngeiah pawh hian thu kan va nei lo siem ti rawh u.

-          He khawvel hi han thlir ila thil hi kan duhdan ni lo hi a va tam teh lul em ti rawh u. Ni tura kan ngaih hi a ni hlei thei tawh lova; ni lo se kan tih hian min tuam tam zawk mah emaw tih tur a ni ta. Inchen tura kan ngaih a inseihleih a. Kan khawvel lah chu mi duham, pamham leh mi awkhrawlte nawmchenna hmun a chang zo ta mai emaw tih tur a ni ta si. Pathian \ihna leh dikna duhna chu retheihna bul emaw tih mai tur a ni tawh a; ram siam\hatna atana Pathian min pek hmanraw pawimawh Politics lah tute emaw pum puarna atan mai kan hmang ta emaw tih tur a ni ta hial mai.

-          Hei vang hian kan ringtu hmasaten vanram an lo ngai ngawih ngawih kha a lo âwm hliah hliah a ni.

Khawvela kan la awm miau avang erawh chuan —

Ka lungawi zel ang, heta ka awm chhungin,

Ka chenna tlawmin rethei mah ila;

Chu khawpui mawiah, tlansate lennaah,

Sum chhe thei ngai lo ka thlir zawk ang.

tithei tura ṭan kan lak sauh sauh a ngai si.

III.  Khawvelah hian Lalpa mite hian...

-          Lungawina beisei tur kan ni reng em?

-          Nawmsakna leh hausakna hi lei dana thlir ve tur kan ni reng em?

-          Khawvel mite awm dan anga awm ve tum vanga lungawi lo mai mai kan ni em?

-          Khawvelin a neih loh, a lei theih loh, a pek theih bawk loh Lal Isua kan nei tih i hre reng ang u. Chu kan rohlu chu khawvel hian a awt em em zawk a. a awmna  a haia, khawvelah hian an zawng zawk a ni.

IV.  Keini kan hmun nghet chu....

-          Tlang thawvengah, chatuan in nuamah, ram êng mawiah chuan kan chuai ve tawh dawn si lova. Chu hmun kan thlen hunah chuan kan vakbo leh tawh lovang a, rangkachak tual nuamah kan lêng tawh dawn si a!

-          KṬP Conference-ah he hla kan sa chu...ka hmangaih kaltate ka ngaihtuah a. An hlim turzia te, Pathian an fak turte chu rinna mita thlirin, ka sa hlei thei lo. Mi ṭhenkhatin vanrama anmahni chhungte hmuh an lo châk hi an thiamawm mang e aw...!

Mahse —

Heti hian ngaihtuah zawk tur a lo ni.

Fanny J. Crosby chuan —

Chatuanin hlimna hla sain awm dawn tawh mah ila,

Ka Chhandamtu tawh hmasak ber ka duh ang a lo ti a.

Van nuamah, Isua, Pa Pathian nena inpawl reng leh angel varho leh mi thianghlimte zingah kan awm ve hunah chuan, Chhandamtu Isua chu min lo lawmtu ber a nih dawn avangin, amah chu kan tawh tura chu a ni si a.

A changin thlemna kan tâwk a, natna avangin kan rûm bawk a. Chu chu chatuana kan awm dan tur ni ta se a va hrehawm dawn êm! Mahse, awmna nghet min siamsak...a va ropui êm!

Chu hmun chu kan phu mawlh lo. Amaherawhchu, Pathian hmangaihna ropui, tawp chin nei lo chuan, kan tan a buatsaih miau si a. A Fapa hmangaih taka ramah chuan min kaitir ta.

Chuvangin —

Mi rethei, mite hmuhsit leh kalsan pawh ni ila, kan thlaphang lova; khawvel miten lallukhum leh chawimawina chhe thei an dawn laiin, lallukhum chhe thei lo leh kan tana hmun a buatsaih chu kan chang dawn a ni.

Mi rethei, kalsan, mi lungngai ka ni lo,

Ka thlaphang ngai lo, van in ka pan;

Khualzin mai ka ni, khawpui chu pan zelin,

Ka thlir lallukhum, chatuan in mawi nen.